Ipinababatid ng Department of Health (DOH) sa publiko na may isang peke at mapanlinlang na Facebook page na nagpapanggap na opisyal na account ng ahensya ang nag-eendorso ng pekeng produkto.
Ayon sa DOH, iniendorso ng pekeng page na ito sa Fcebook ang isang milk supplement na sinasabing lunas umano sa chronic insomnia.
Mariing pinasinungalin ng DOH ang sa isang post ang pekeng Facebook page at sinabing walang kaugnayan ang nasabing page sa kanilang opisina, at hindi nila ineendorso ang anumang produktong ipinapakita rito.
Ipinaalam na ng DOH sa Department of Information and Communications Technology (DICT) ang insidente upang maalis ang naturang page.
Muling pinaalalahanan ng ahensya ang publiko na maging maingat at tiyaking sa mga opisyal na social media accounts lamang ng DOH magtitiwala. Babala rin nila, maaaring humarap sa kasong kriminal ang mga nasa likod ng pagkalat ng maling impormasyon.| ulat ni EJ Lazaro
