Nauwi sa isa pang contempt order ang pag-iwas ni dating Mandaluyong Police chief Col. Hector Grijaldo na sagutin ang mga katanungan ng mga mambabatas sa pag-dinig ng Quad Committee.
Partikular dito ang kaniyang paratang na pinilit siya nina Quad Comm Co-chairs Dan Fernandez at Benny Abante na patotohanan ang salaysay ni dating PCSO General Manager Royina Garma na mayroon ngang reward system sa war on drugs ng nakaraang administrasyon.
Paulit-ulit na ininvoke ni Grijaldo ang kaniyang right to self-incrimination habang tinatanong kaugnay sa kaniyang isinumiteng affidavit sa Senado.
Dahil dito, pina-contempt ni co-chair Joseph Stephen Paduano si Grijaldo dahil sa paglabag sa Section 11, Paragraph C ng House Rules of Procedure Governing Inquiries in Aid of Legislation.
Madedetine siya sa Quezon City Police District Station 6 hanggang sa mapagtibay ang committee report ng komite sa plenaryo.
Hindi naman napigilan ni overall chair Robert Ace Barbers na punahin ang pag-iwas ni Grijaldo.
Aniya, noong humarap siya sa Senado ay buong tapang niyang inakusahan ang mga mambabatas, ngunit ngayon ay nagtatago sa right against self-inrimination na hindi naman angkop sa sitwasyon.
“The resource person is out of order, and let it be of record that he is continuously disrespecting this committee by refusing to answer appropriately. Noong nasa Senado ka ang tapang-tapang mo eh. Bakit dito ayaw mo? Magtapang ka rito. Ipakita mo ‘yung the same candor, the same tapang na pinakita mo doon. Nag-imbento ka ng kwento and then you speak about honor? Alam mo ba bakit may honor? ‘Pag hindi ka sinungaling, may honor ka. As simple as that. You’re a police officer, and you should have that honor,” diin ni Barbers
Puna pa ni Lanao del Sur Rep. Zia Alonto Adiong na tila pinapalabas ni Grijaldo na pinagtutulungan siya ng komite.
Tinukoy din ni Quad Comm senior vice-chair Romeo Acop na bilang dating imbestigador, alam dapat ni Grijaldo kung kailangan maaari i-invoke ang right against self-incrimination. | ulat ni Kathleen Forbes