Tuloy-tuloy na ang pinaigting na hakbang ng Quezon CityLGU bilang tugon sa dengue outbreak sa lungsod.
Kasama rito ang kaliwa’t kanan nang spraying/fogging sa mga cluster areas sa lungsod pati na ang mga eskwelahan.
Nitong weekend, isinagawa ito sa Barangay Unang Sigaw, Barangay Marilag, at maging sa mga eskwelahan tulad ng Project 3 Elementary School at Marilag Daycare Center sa pangunguna ng mga barangay.
Bukod dito, tuloy-tuloy pa rin ang pagkonsulta sa mga Health Center para sa mga pasyenteng posibleng may dengue.
Isinasagawa rito ang dengue test, case investigation, at active case finding sa layuning matukoy ang mga bagong kaso at mapigil ang lalo pang pagdami ng dengue sa komunidad.
Una nang hinikayat ng pamahalaang lungsod ang mga residente na huwag nang palalain ang sintomas o mag-self medicate at magpakonsulta na kung may sintomas ng dengue. | ulat ni Merry Ann Bastasa
