Arestado ng Philippine National Police Highway Patrol Group ang isang lalaki matapos mahulihan ng humigit kumulang 15 kilo ng hinihinalang shabu.
Ito’y kasunod ng ikinasang anti-carnapping operation at checkpoint ng HPG sa Maharlika Highway, Brgy. New Mahayag, Catbalogan City sa Samar.
Ayon kay PNP-HPG Spokesperson, PLt. Nadame Malang, nakilala ang naaresto sa alyas na Toper na siyang naghatid ng naturang mga kontrabando.
Nabisto aniya ang mga naturang droga sa pamamagitan ng plain view doctrine habang nagsasagawa ng operasyon ang pulisya sa nabanggit na lugar.
Kasalukuyang iniimbentaryo na ng mga awtoridad ang nakuhang mga illegal na droga habang ikinakasa naman ang kaso laban sa suspek, partikular na ang paglabag sa Republic Act 9165 o Comprehensive Dangerous Drugs Act of 2002. | ulat ni Jaymark Dagala
