Pinagtibay ng Japan-based debt watcher na Rating and Investment Information (R&I) ang investor credit rating ng Pilipinas sa “BBB+”.
Binago rin ng R&I ang “outlook” nito mula sa stable sa “positive” dahil sa matatag na macroeconomic fundamentals, mas pinahusay na fiscal position, maayos na banking system, external payments position, at stable political environment.
Sinabi ni Finance Sec. Benjamin Diokno na ang “improved outlook” ng R&I sa Pilipinas ang magdadala sa target ng economic team na makamit ang “A” rating sa ilalim ng administrasyong Marcos Jr.
Diin pa ng kalihim na on-track ang gobyerno at komited sa hangarin na paghusayin ang investment climate ng bansa sa pamamagitan ng structural reforms at pagpapahusay ng imprastraktura.
Ang ‘BBB+’ rating ay dalawang puntos na mas mataas sa minimum investment grade at isang puntos na mababa sa ‘A-‘ rating.
Habang ang positive outlook ay indikasyon na maaring magkaroon ng rating upgrade kapag nakuha ang mga performance indicator. | ulat ni Melany Valdoz-Reyes
