Nilagdaan nina Foreign Affairs Secretary Enrique Manalo at Japanese Ambassador to the Philippines Kazuhiko Koshikawa ang Exchange of Notes para sa pagkakaroon ng loan facility at grant project sa ilalim ng Official Development Assistance ng Japan.
Nakapaloob sa nasabing grant project ang Phase 3 ng Post Disaster Stand-by Loan (PDSL 3) at ang Satellite Data Communication System ng Philippine Coast Guard.
Sa ilalim ng PDSL 3, pauutangin ng Japan ang Pilipinas ng JP¥30 bilyon upang suportahan ang mabilis na pagbangon ng bansa mula sa mga natural at health-related disasters at makapagbigay ng budgetary support sa calamity response programs ng Pilipinas na babayaran sa loob ng 30 taon matapos ang grace period ng sampung taon na may fixed interest rate na 0.01% per annum.
Habang aabot naman sa JP¥1.1 bilyon naman ang grant aid ng Japan para sa Satellite Data Communication System ng PCG. Sa oras na makumpleto ang proyekto ay inaasahang mapapabuti ang Maritime Domain Awareness (MDA) at maritime law enforcement capabilities ng PCG, at sa gayon ay makatutulong sa socio-economic development ng Pilipinas, pagpapalakas ng kooperasyon sa Sulu-Celebes Sea at sa mga nakapaligid na lugar nito pati na rin ang pagsasakatuparan ng malaya at bukas na Indo-Pacific Region. | ulat ni Gab Villegas
📷: Embassy of Japan in PH