Isasagawa mamayang alas-7 ng gabi sa PNP Multi-Purpose Center ang Necrological Service para sa yumaong dating PNP Chief Ret. Police General Camilo Pancratius Cascolan.
Ito ang inanunsyo ni PNP Public Information Office Chief Police Col. Jean Fajardo sa Pulong balitaan sa Camp Crame.
Si Cascolan na nagsilbing ika-24 PNP Chief mula Setyembre 2020 hanggang Nobyembre 2020 ay pumanaw noong Nobyembre 24 dahil sa “lingering illness”.
Sinabi ni Fajardo, na batay ito sa pagsusuri ng Medico Legal Officer ng PNP.
Paliwanag ni Fajardo, medico legal ang nagsagawa ng pagsusuri base na rin sa kahilingan ng pamilya noong araw na ito ay mamatay dahil out of town ang kanyang attending physician.
Nagkausap naman daw ang medico legal officer at attending physician at nagkasunod naman sila sa kanyang ikinamatay.
Gayunman, sinabi ni Fajardo na ipauubaya na ng PNP sa pamilya ang desisyon sa pagsasagawa ng autopsy para masiguro ang “cause of death”. | ulat ni Leo Sarne
