Kasunod ng pagkakatalaga kina Defense Secretary Gilbert Teodoro at Health secretary Teodoro Herbosa, nanawagan si Senate Minority Leader Koko Pimentel kay Pangulong Ferdinand R. Marcos Jr.
na magtalaga na rin ng permanenteng secretary ng Department of Agriculture (DA).
Ayon kay Pimentel, panahon na para magkaroon ng pinuno ang DA para matutukan ang mga isyu sa sektor ng agrikultura, lalo na ang may kinalaman sa food security.
Sinabi ng mambabatas na dapat ay isang eksperto sa mga usapin tungkol sa sektor ng agrikultura ang i-appoint bilang DA secretary.
Pinaliwanag mg minority leader na magiging malaking tulong sa administrasyon ang pagkakaroon ng permanenteng kalihim ng agriculture department dahil makakabawas rin ito sa mga iniisip at trabaho ni Pangulong Marcos.
Sa ngayon, mismong si Pangulong Marcos ang tumatayo bilang DA secretary at ito na lang ang ahensya na wala pang permanenteng kalihim.| ulat ni Nimfa Asuncion
