Walang ginamit na pera ng gobyerno sa ibinigay na pagdiriwang ng kanyang kaarawan kagabi para kay Pangulong Ferdinand R. Marcos Jr.
Ito ang binigyang diin ni Presidential Communications Office (PCO) Secretary Cesar Chavez, kasunod ng pagdiriwang na ibinigay sa Pangulo na inorganisa ng kanyang mga kaibigan sa isang hotel sa lungsod ng Pasay.
Sinabi sa ipinadalang mensahe ni Chavez, “At no cost to the government” ang ginugol sa selebrasyon ng ika-67 taong kaarawan ng Pangulo, at mga kaibigan niya ang sumagot nito.
Dinaluhan ng Pangulo ang birthday celebration na inorganisa ng kanyang mga kaibigan matapos ang personal na pamamahagi ng certificates of condonation at paglulunsad ng financing program sa mga magsasaka sa Nueva Ecija, at pagbibigay direktiba na sagutin ang hospital bill ng mga qualified patients na nagpapagamot sa third-level DOH hospitals.
Bukod dito ay binuksan din ng Pangulo ang Malacañang sa publiko para sa kanyang birthday.| ulat ni Alvin Baltazar
