Nakarating na sa lalawigan ng Batanes ang 8,995 family food packs mula sa Department of Social Welfare and Development (DSWD) na ipinadala noong Linggo.
Ang mga food packs ay sakay ng BRP Gabriela Silang ng Philippine Coast Guard at C-130 aircraft ng Philippine Air Force.
Agad itong ipapamahagi sa mga biktima ng mga nagdaang bagyo at bilang bahagi ng paghahanda sa posibleng epekto ng bagyong Nika.
Kaugnay nito, patuloy pa ang pakikipagtulungan ng DSWD sa Provincial Disaster Risk Reduction and Management Office – Batanes, PCG, PAF, Bureau of Fire Protection, PNP, Philippine Army, Philippine Navy, at mga Reservist upang maipadala at maibaba ang mga FFPs sa nasabing probinsya.
Samantala, habang patuloy ang malakas na ulan dulot ng bagyong Nika sa Marag Valley, Luna, Apayao, naideploy na dito ng DSWD Field Office CAR ang Mobile Command Center.
Magagamit din ito ng publiko para sa libreng charging at WiFi at sa isasagawang payout at relief efforts sa lugar. | ulat ni Rey Ferrer
