Naiprisinta na ni Senate Committee on Social Justice Chairperson Senator Imee Marcos ang panukalang layong tugunan ang lahat ng uri ng diskriminasyon at karahasan…ito ang Senate Bill 2766 o ang Comprehensive Anti-Discrimination bill.
Sa ilalim ng panukala, itinataguyod ang dignidad at pagkakapantay-pantay anuman ang edad; lahi; etniko o katutubong pinagmulan; relihiyon; paniniwalang pulitikal; estado sa buhay; kasarian; sexual orientation, identity o expression; marital relationship status; health status; trabaho; physical features; at iba pa.
Itinatakda nito ang pagpapataw ng parusa sa magdudulot ng stigma at mag-uudyok ng karahasan o sekswal na pang-aabuso, at magkakait ng mga karapatan sa sinuman.
Exempted naman sa pinapanukalang batas na ito ang occupational qualifications; religious considerations alinsunod sa batas, public order, o public policy; at kung ang isang aksyon ay ginawa para matulungan ang isang tao o grupo.
Sinumang mapapatunayang lumabag sa anumang probisyon nitong panukala ay papatawan ng parusang pagkakakulong ng mula siyam na buwan hanggang 12 taon o multa na mula P100,000 hanggang P500,000.
Ang multang makokolekta dito ay ire-remit sa Commission on Human Rights (CHR) para matulungan ang mga biktima ng diskriminasyon.
Itinatakda rin na pangunahan ng CHR ang isang inter-agency council on non-discrimination and equal opportunity.
Ito ay isang advisory at recommendatory body na magtataguyod ng mga programa kontra diskriminasyon at pagpapalaganap ng diversity sa bansa. | ulat ni Nimfa Asuncion
