Agad ipinag-utos ng lokal na pamahalaan ng Batangas ang pagkuha ng water sampling sa karagatan ng Batangas.
Ito ay matapos matanggap ang impormasyon na nakarating na sa kanilang karagatan ang oil spill mula sa lumubog na barko sa Oriental Mindoro.
Ayon kay Batangas Governor Dodo Mandanas, kabilang sa unang susuriin ang kalidad ng tubig sa Verde Island, Ilihan, Pagkilatan, at Dela Paz. Ito’y upang malaman kung kontaminado ito ng langis.
Samantala, nagpatawag ng pagpupulong si Batangas Lobo Mayor Lota Manalo para alamin ang kahandaan ng 10 coastal barangay sa kanilang lugar.
Hinimok din ng alkalde ang mga residente na tumulong sa paghanap ng materyales na pangharang sa oil spill tulad ng bunot ng niyog, lumang damit, lubid, sako, at bote ng tubig. | ulat ni Don King Zarate
