Kumpiyansa si Senador Ronald ‘Bato’ dela Rosa na maaaprubahan ngayon ng kongreso ang panukalang batas tungkol sa pagkakaroon ng bagong pension system para sa mga bagong military at uniformed personnel (MUP).
Ginawa ng senador ang pahayag matapos sabihin ni Finance Secretary Benjamin Diokno na kailangan nang tugunan ang lumulobong halaga ng pensyon para sa retirees na maaaring mauwi sa fiscal collapse.
Ipinunto ni Dela Rosa, na halos two thirds ng taunang budget ng Armed Forces of the Philippines (AFP), Philippine National Police (PNP), at Bureau of Fire Protection (BFP) ang napupunta sa personnel services, kung saan kasama ang pension at gratuity fund.
Giit ng senador, dapat ay mas malaking pondo ang inilalaan para sa capital outlay at MOOE (maintenance and other operating expenses), para mapaganda ang performance ng mga ahensya.
Naniniwala naman ang mambabatas, na hindi magreresulta sa demoralisasyon ng mga MUP ang ipinapanukalang bagong pension system, bilang mag-aapply lang ito sa mga bagong papasok sa serbisyo. | ulat ni Nimfa Asuncion
