Bukas si Senate Committee on Ways and Means Chairperson Senador Sherwin Gatchalian sa panukala na palawigin ang Estate Tax Amnesty period.
Gayunpaman, binigyang diin ni Gatchalian na kailangan munang tugunan ang isyu ng korapsyon sa mga tax collecting agencies ng bansa.
Ibinahagi ng senador na marami kasing nagrereklamo na pinapahirapan silang mag-apply ng Estate Tax Amnesty at ang ilan ay hinihingan ng mga dokumento na wala naman sa ilalim ng batas.
Marami rin aniyang lumalapit sa mga fixer kaya nais ng mambabatas na maimbestigahan muna ang corruption issues at ang mga alegasyon na pinapahirapan ang mga aplikante.
Kaugnay nito, plano ni Gatchalian na magsagawa ng Senate Inquiry tungkol sa mga corrupt activities na nagaganap sa paghahain ng tax amnesty. | ulat ni Nimfa Mae Asuncion
