Nagsagawa rin ng pag-iinspeksyon sa mga terminal ng pampublikong transportasyon si Philippine National Police – Civil Security Group o PNP-CSG Director, P/BGen. Benjamin Silo
Ito’y para tingnan kung nasusunod ba ng mga security guard ng mga terminal ang kanilang trabaho at obligasyon kaugnay sa pagbibigay serbisyo sa mga pasahero ngayong Semana Santa.
Unang binisita ni B/Gen. Silo ang mga bus terminal sa Cubao, Quezon City gayundin sa Parañaque Integrated Terminal Exchange o PITX.
Dito, kaniyang pinaalalahanan ang mga security guard na sundin ang tamang paghihigpit nang hindi makaaabala at mayroong paggalang sa mga pasahero.
May 2 pang security guard sa Cubao Terminal ang kaniyang nasita dahil sa walang Duty Details Order o DDO ang mga ito na kinakailangan bago sila mag-duty. | ulat ni Jaymark Dagala
