Seryoso ang Government Service Insurance System (GSIS) sa pagtulong sa pamahalaan na mapalawak ang healthcare benefit ng mga Pilipino.
Sa ika-86 anibersaryo ng GSIS ngayong araw (May 31), sinabi ni GSIS President Wick Veloso na kaninang umaga, lumagda na sila ng kasunduan katuwang ang Philippine Health Insurance Corporation (PhilHealth) para sa paglalabas ng GSIS Surety Bonds para sa primary care provider network ng PhilHealth.
“Nitong umaga lamang, pumirma kami ng kasunduan kasama ang PhilHealth, para sa pagpapalabas ng GSIS surety bonds for PhilHealth’s primary care provider networks.” — Veloso
Sa pamamagitan aniya ng surety bonds na ito, ang bawat PhilHealth member ay mabibigyan ng libreng konsultasyon mula sa mga pangunahing healthcare facility sa bansa.
“Sa pamamagitan ng surety bonds na ito ang bawat PhilHealth member ay mabibigyan ng libreng konsultasyon sa primary healthcare facilities ng bansa, kasi ensured ng GSIS ang PhilHealth.” — Veloso
Pagbibigay diin ng opisyal, layunin nila sa GSIS na matulungan ang mga Pilipino. Aniya, tuwing magkakasakit ang isang empleyado ng pamahalaan dapat ay sa pagpapagaling na lamang ito nakatutok, at hindi sa kung magkano at saan huhugutin ang pambayad sa ospital. | ulat ni Racquel Bayan
