Isinusulong ni House Committee on Good Government and Public Accountability Vice Chairperson Johnny Pimentel na alisin na sa ilalim ng PNP ang Internal Affairs Service o IAS.
Ito ang nakikitang solusyon ng mambabatas upang magkaroon ng mas malakas, epektibo at independent na ‘watchdog’ laban sa mga tiwaling pulis.
Kasunod na rin ito ng mga naisiwalat na anomalya sa drug operations ng ilang pulis matapos imbestigahan ng kamara at senado ang P6.7 billion shabu buy-bust sa Maynila noong nakaraang taon.
“The illegal drug trade in particular is clearly having a monstrous corruptive influence on police officers, and we must counteract this. Our sense is, we need a tougher watchdog that can swiftly carry out administrative and criminal investigations of police wrongdoing without fear or favor,” diin ni Pimentel.
Mungkahi ng Surigao del Sur solon, magpasa ng panukala kung saan ihihiwalay na ang IAS sa PNP at direktang nang mapasailalim sa pamamahala ng DILG.
Sa paraan aniyang it ay mas magiging malaya ang IAS sa kanilang imbestigasyon at rekomendasyon at malayo sa impluwensya ng mga pulis.
Nabuo ang IAS sa ilalim ng PNP Reform and Reorganization Law of 1998 para imbestigahan ang mga paglabag ng miyembro ng PNP.
Magkagayonman anumang report o review na ilabas ng IAS ay sasailalim pa sa review ng superior officers at maaaring mabaliktad. | ulat ni Kathleen Jean Forbes
