Tiniyak ni Pangulong Ferdinand R. Marcos Jr. ang kahandaan ng national government para tumulong sa LGU na nakasasakop sa mga lugar na posibleng tamaan ng bagyo na tatawaging Betty sa sandaling makapasok na sa PAR.
Sa media interview sa Punong Ehekutibo, sinabi nitong mayroong pakikipag-ugnayan na ginagawa sila sa mga nasa lokal na pamahalaan sa gitna ng pagnanais nilang maging updated sa sitwasyon ng mga lugar na tatamaan ng bagyo.
Kaugnay nito’y sinabi ng pangulo na ngayong linggong ito ay halos puspusang preparasyon na ang ginagawa ng ibat ibang ahensiya ng gobyerno para sa nakatakdang pagdating ng bagyo.
Kung anuman aniya ang kakailanganin ng mga kinauukulang LGU ay handa ang pamahalaang nasyonal na tumugon base sa kanilang magiging pangangailangan.
Sa ngayon sabi ng pangulo ay ipinauubaya nila sa LGU ang anumang hakbang na kanilang gagawin sa kanilang nasasakupan pero tiniyak na nakaalalay naman ang national government kung kailangan. | ulat ni Alvin Baltazar
