Pinaplano ni Senate President Juan Miguel Zubiri na bumuo ng isang tanggapan sa Senado, na tututok sa pagbusisi sa pagpapatupad ng mga proyekto ng mga ahensya ng gobyerno na pinondohan ng Kongreso.
Ang pahayag na ito ni Zubiri ay kasunod ng pagsisiwalat ni Senador Raffy Tulfo ng mga proyekto ng National Irrigation Administration (NIA) na hindi pa natatapos at hindi pa nasisimulan.
Ayon sa Senate President, magiging pangunahing tungkulin ng bubuuing tanggapan na magkaroon ng tracker team para bumusisi sa mga proyekto ng iba’t ibang ahensya ng gobyerno.
Matutulungan aniya nito ang Kongreso, na matukoy ang absorptive capacity ng isang ahensya upang maging batayan ng ibibigay na pondo sa isang ahensya, at sa pagbuo ng pambansang budget.
Binigyang diin ni Zubiri, na kung makikita sa pagsusuri na hindi pa nagagawa ng mga ahensya ang mga proyektong pinaglaanan ng pondo ay dapat aniyang hindi na sila bigyan ng dagdag na pondo o maaari pang mabawasan sila ng paglalaanang pondo. | ulat ni Nimfa Asuncion
