Sa pamamagitan ng viva voce voting ay pinagtibay ng Kamara sa ikalawang pagbasa ang House Bill 8009 o Expanded Anti-Violence Against Women and their Children (E-VAWC) Act.
Sa ilalim nito, maituturing na ring pang-aabuso sa kababaihan at mga bata ang porma ng karahasan gamit ang teknolohiya tulad ng stalking, pangha-harass sa text messages at chat, at pagkuha at pagpapakalat ng video o paggawa ng pekeng social media account para siraan ang asawa o ka-partner.
Oras na maging ganap na batas, nasa P300,000 hanggang P500,000 ang maaaring ipataw na multa para sa E-VAWC bukod pa sa pagkakakulong.
Inaatasan din sa panukala ang mga internet service provider, na agad i-take down o burahin ang naturang electronic violence, at kung hindi makikipagtulungan sa otoridad ay ituturing na obstruction of justice.
Sa ilalim ng kasalukuyang Republic Act 9262 o Anti-Violence Against Women and Their Children ay hindi pa kasama ang electronic violence.
Isang kahalintulad na panukala na ang pinagtibay noong nakaraang Kongreso, ngunit hindi umusad sa Senado. | ulat ni Kathleen Forbes
