Pinatitiyak ni Pangulong Ferdinand R. Marcos Jr. kay Department of the Interior and Local Government (DILG) Secretary Benjamin Abalos na maibababa sa mga local government ang kampanya ng pamahalaan na may kinalaman sa El Niño mitigation.
Sa gitna na rin ito ng inaasahang matagal na mararanasang tagtuyot ng bansa na ayon sa Pangulo ay baka umabot pa ng 1st quarter ng 2024.
Kabilang sabi ng Pangulo sa El Niño mitigation ang pagtitipid sa paggamit ng tubig na malaking tulong para makasiguro sa suplay ng tubig.
Sa tindi, aniya, ng init na nararanasan na sinasabayan ng bihirang mga pag-ulan ay lubhang malaki ang epekto nito hindi lang sa mga dam kundi pati na sa irigasyon at hydro electric power.
Dagdag ng Pangulo, dapat na ring magtipid sa kuryente bilang bahagi ng energy conservation sa gitna ng mga epektong kakaharapin dahil sa El Niño. | ulat ni Alvin Baltazar
