Lumagda ng isang Memorandum of Agreement ang Commission on Elections (COMELEC), at ang Pamahalaang Lungsod ng Parañaque, sa pamamagitan ng mga kinatawan ng mga political parties sa Lungsod para sa Mall Voting Project.
Ito ang unang pagkakataon na gagamitin ang mga mall bilang botohan kung saan SM City Sucat ang isa sa napili para sa pilot areas para sa Mall Voting.
Ang mga kinatawan mula sa local party na Bagong Parañaque, Liberal Party, Lakas CMD, PDP Laban, at National Party Coalition ang lumagda sa nasabing MOA.
Nakapaloob sa Memorandum of Agreement ang pagpayag ng mga partido politikal sa pamamagitan ng kanilang mga representative na ilipat ang limang cluster precincts ng lungsod na may 2,481 na mga rehistradog botante mula Parañaque National High School patungong SM City Sucat.
Nauna na ring inihain ni Parañaque First District Representative Edwin Olivarez ang House Bill 6854 o ang “Mall Voting Convenience Act of 2023” na kasalukuyan pang nakabinbin sa House Committee on Suffrage and Electoral Reforms. | ulat ni Gab Humilde Villegas
