Naaresto na ng National Bureau of Investigation (NBI) ang dalawang illegal recruiter sa Paco, Maynila.
Dinakip sina Marissa Rumbaoa Ursulum at Michelle Dichoso matapos ireklamo ng isang aplikante.
Base sa ulat, nakita lang ng complainant sa Facebook account ang posts ng isang “Asarim Rumbaoa” na nangangalap ng gustong magtrabaho sa abroad.
Nagpakilala pa itong konektado sa isang licensed recruitment agency na Hard Earned Opportunities, Inc.
Pinangakuan ang complainant na makapagtrabaho sa isang fishing vessel sa Korea at may sahod na $400 o P22.292 kada buwan.
Pero sa ginawang berepikasyon ng complainant, nalaman nitong hindi awtorisadong mag-recruit ang dalawa
Dinakip sila ng mga operatiba ng NBI nang ibigay ang hinihinging P35,000 na kabayaran para sa processing fee. | ulat ni Rey Ferrer
