Nagpaabot ng pagbati ang Department of National Defense o DND sa lahat ng mga kapatid na Muslim sa bansa gayundin sa ibayong dagat.
Ito’y kaalinsabay ng pagdiriwang ng Eid’l Adha o Feast of Sacrifice kung saan ginugunita ang ginawang pag-aalay ni Ibrahim sa kaniyang anak na si Ishmael kay Allah.
Sa isang pahayag, sinabi ni Defense Sec. Gilberto Teodoro Jr., sagrado ang araw na ito dahil dito inaalala ng mga Muslim ang kahandaan ni Ibrahim na sundin ang utos ni Allah na isakripisyo ang kaniyang anak na si Ishmael.
Pagkakataon aniya ito para makapagnilay-nilay ang bawat isa, makapagbahagi ng biyayang natanggap at magpakita ng pagtutulungan.
Kasunod nito, pinasalamatan ni Teodoro ang lahat ng mga muslim na kasama sa Defense department para sa kanilang serbisyo sa bansa at sa pagpapanatili ng kapayapaan. | ulat ni Jaymark Dagala
