Inanunsiyo ng Food and Drug Administration (FDA) ang pagkakaapruba ng Certificate of Product Registration (CPR) ng Comirnaty Original/Omicron B.A 4-5 o Pfizer bivalent vaccine.
Ang CPR ang pangunahing requirement para mapahintulutan ang isang produkto na maibenta sa merkado.
Nagawaran ng CPR ang bakuna, apat na buwan matapos ang application nito sa ahensya.
Ayon kay FDA Director General Dr. Samuel Zacate, ang hakbang na ito ay maituturing na milestone dahil ito ang unang bakunang magiging available sa merkado.
Pero nilinaw ng FDA, na may tatlong kondisyon para sa pagbili ng bivalent COVID-19 vaccine sa mga botika.
Dapat may prescription ito mula sa doctor, dapat may consent ng pasyente, at dapat lisensyadong healthcare worker ang magtuturok nito sa mismong botika.
Ang COVID-19 bivalent vaccine rin ay magiging available para sa mga edad 12 pataas.
Sa ngayon ay wala pang detalye kung magkano ang magiging bentahan ng mga Pfizer COVID-19 bivalent vaccine sa botika.
Sinabi ng FDA na hihintayin na munang dalhin ng Pfizer ang mga stock ng bakuna dito sa ating bansa. | ulat ni Nimfa Asuncion
