Inaayos na ng dalawang Kapulungan ng Kongreso at Office of the President ang guest list para sa ikalawang State of the Nation Address ni Pangulong Ferdinand R. Marcos Jr.
Ayon kay House Sec. Gen. Reginald Velasco, hinihintay pa nila ang guest list ng Senado at Office of the President bago maisapinal ang sarili naman guest list ng Kamara.
Kailangan kasi ikonsidera ang nawalang first gallery sa plenaryo ng House of Representatives na katumbas ng 500 seats.
Kaya mas maigi aniya kung maagang maipapadala ng Senado at Office of the President ang listahan ng kanilang mga bisita.
“We are just preparing, number one, the guest list. Kasi very important yung guest list from the Senate, from the Office of the President, before we can finalize our own guest list. As you know, natanggal yung first gallery, so we lost about 500 seats.” sabi ni Velasco.
Noong unang SONA ni PBBM ay umabot sa 1,360 ang inimbitahang bisita. | ulat ni Kathleen Jean Forbes
