Nananatiling mahalaga ang pagpapabuti ng efficiency ng social protection sa Pilipinas upang protektahan ang mga mahihirap at mga bulnerable laban sa economic shocks habang humaharap ang bansa sa global uncertainties at domestic risks, batay sa Philippines Economic Update (PEU) na inilabas ng World Bank.
Dahil sa global trends, ang malakas na domestic demand sa Pilipinas ay inaasahang aabot ng six percent ang economic growth ng bansa ngayong taon at 5.9 percent naman pagsapit ng 2024.
Ang malakas na domestic demand ay nakabatay sa consumer spending na nagmumula sa patuloy na job recovery at tuloy-tuloy na pasok ng remittances.
Makatutulong din ang fixed capital investment sa paglago na naka-angkla sa mas mataas na domestic activity at pinabuting business confidence.
Sinabi ng PEU na ang pagtitiyak ng mahusay na paghahatid ng mga social protection program ay mangangailangan ng pagpapabilis ng mga kasalukuyang reporma ng pamahalaan, kabilang ang pagpapatibay ng national ID system para sa paghahatid ng social protection, pag-update ng targeting system para sa pagtukoy sa mga mahihirap at vulnerable na mga pamilya, mga innovation sa mga digital payment systems, at pagpapalakas ng financing mechanisms at kahandaan para sa pagtugon sa kalamidad. | ulat ni Gab Humilde Villegas
