Naglaan ng special flights ang Saudia Airlines para sa mga kapatid sa Islam na tutungo sa Medina para sa banal na Hajj.
Ayon sa Manila International Airport Authority o MIAA Media Affairs Division, ito ay para mabigyan ng pagkakataon ang mas maraming kababayang Muslim na makatungo sa banal na lungsod upang mag-alay ng pagsamba at panalangin.
Maliban sa Saudia Airlines, tuloy-tuloy din ang paghahandog ng kanilang flights ang Philippine Airlines o PAL mula Maynila patungong Medina at pabalik.
Sa pag-iikot ng Radyo Pilipinas sa paliparan, kapansin-pansin ang tuwa ng mga kapatid na Muslim na makatungo sa Hajj sa tulong ng National Commission on Muslim Filipinos o NCMF.
Gayunman, nagpaalala ang mga awtoridad sa mga kapatid na Muslim na mag-ingat sa mga naglipanang kawatan na ginagamit ang okasyon para magsamantala. | ulat ni Jaymark Dagala
