Hinimok ni Senador Pia Cayetano ang mga nanay na makinig sa payo ng mga medical professional at health workers tungkol sa kahalagahan ng pagpapabakuna ng kanilang mga anak.
Binigyang diin ng senador, na huwag pansinin ang fake news tungkol sa mga bakuna na kumakalat sa mga social media platform.
Ipinunto ni Cayetano ang balita kamakailan na tumataas ang mga kaso ng measles sa Pilipinas, kung saan base sa datos mula sa Department of Health (DOH) ay nitong weekend ay tumaas ng 339 percent ang mga measles case hanggang nitong May 20.
Nakakalungkot aniyang may mga kabataang namamatay dahil sa tigdas dahil maaari naman itong maiwasan sa pamamagitan ng routine vaccination.
Dapat aniyang makinig at mas maniwala sa mga doktor at iba pang lehitimong health workers tungkol sa kung ano ang makakabuti para sa kanilang mga anak.
Si Cayetano ang principal sponsor sa Senado ng Mandatory Infants and Children Health Immunization Act of 2011 (Republic Act 10152). | ulat ni Nimfa Asuncion
