Naniniwala si Senate Majority Leader Joel Villanueva na walang puwang para sa ibang interpretation ang inilagay ng Senado na probisyon sa Maharlika Investment Fund (MIF) Bill, tungkol sa pagbabawal sa pension funds ng SSS at GSIS na ma-invest sa MIF, mandatory man o voluntary.
Bukod sa Social Security System (SSS) at Government Service Insurance System (GSIS), kasama ring bawal na mag-invest sa MIF ang PhilHealth, Pag-IBIG, Overseas Workers Welfare Administration (OWWA), at Philippine Veterans Affairs Office (PVAO).
Katunayan ayon kay Villanueva ay tatlong beses inulit ang prohibition na ito.
Una sa bahaging nagtatakda ng preferred investors ng Maharlika Investment Corporation (MIC); sa bahaging tumutukoy ng capitalization ng MIC; at sa bahagi tungkol sa mga investor ng MIF.
Umaasa ang majority leader, na ang implementing rules and regulations (IRR) na mabubuo sakaling maisabatas ang MIF bill ay magiging tapat at susundin ang panukalang kanilang inaprubahan. | ulat ni Nimfa Asuncion
