Pinayuhan ni Senate Committee on Ways and Means Chairperson Senador Sherwin Gatchalian ang mga planong mag-avail ng estate tax amnesty, na mag-apply pa rin para dito kahit pa hindi pa napipirmahan ang batas para sa extension nito.
Ngayon na kasi nakatakda ang deadline para sa paghahain ng estate tax amnesty, at hanggang ngayon ay hindi pa napipirmahan ni Pangulong Ferdinand R. Marcos Jr. ang panukalang batas na nagpapalawig nito hanggang June 2025.
Paliwanag ni Gatchalian, retroactive naman ang pagpapatupad ng tax amnesty kaya pwede pang maghain nito kahit wala pa ang batas para sa extension.
Makukuha na lang aniya ang amnesty oras na ganap na itong maisabatas.
Iginiit ng senador, na wala naman siyang nakikitang dahilan para hindi mapirmahan ang batas para sa extension, maaari aniyang na-delay lang ang pagpirma dito dahil sa dami ng dapat pirmahan ng pangulo.
Ganito rin aniya ang naging pagpapatupad sa dalawang nakaraang extension para sa estate tax amnesty. | ulat ni Nimfa Asuncion
