Nagsimula na kaninang madaling araw ang unang flight ng Asiana Airlines mula Incheon, South Korea patungong Panglao, Bohol.
Dumating sa Bohol Panglao International Airport (BPIA) ang Asiana Airlines Flight OZ 7093 kaninang 12:13 ng madaling araw, lulan ang 177 na mga pasahero.
Sinalubong nina BPIA Acting Airport Manager Anghelo Ibanez, mga opisyal mula sa lokal at pamahalaang panlalawigan, local media, at airline executives.
Ayon kay Ibanez, tuwing araw ng Miyerkules at Sabado ang magiging flight ng Asiana Airlines patungong Bohol at layon pang palakasin ang direct flights patungong Bohol sa hinaharap.
Ang patuloy na pagtaas ng bilang ng flights patungong Bohol, lalo na ang international flights ay nagpapakita ng pagtaas sa demand ng mga pasahero, at mga turistang bumibisita sa lalawigan na magreresulta sa paglakas ng economic activities sa lalawigan. | ulat ni Gab Villegas
