Matapos ideklara ng National Museum ang Baclaran Church bilang isang “important cultural property,” naghain si Senador Jinggoy Estrada ng panukalang batas para hirangin ang National Shrine of Our Mother of Perpetual Help (Baclaran Church) at ang lugar sa paligid nito bilang isang heritage site at tourist destination.
Sa kanyang Senate Bill 2278, sinabi ni Estrada na bahagi na ng ispiritwal na buhay ng mga Pilipino ang simbahan ng Baclaran, at parte na rin ito ng makasaysayang tradisyon ng mga Katoliko sa bansa lalo na ang mga naninirahan sa Metro Manila at mga kalapit na lugar.
Sa paghirang dito bilang isang heritage site at tourist destination, aatasan ang Department of Tourism (DOT) na makipagtulungan sa National Historical Commission of the Philippines (NHCP), Department of Public Works and Highways (DPWH), Lokal na Pamahalaan ng Parañaque, at iba pang kinauukulang ahensya na maglatag ng plano para mapaunlad ang turismo sa lugar.
Kasama sa plano na ito ang pagtatayo, paglalagay, at pagpapanatili ng angkop na pasilidad at imprastruktura upang mapahusay ang kabuuan ng paligid ng Baclaran Church, at tiyakin ang accessibility at seguridad ng mga turista.
Ayon kay Estrada, ang pondo para sa implementasyon ng tourism development plan ay isasama sa budget ng Parañaque LGU.
Bukod dito, ang DOT ay magbibigay ng teknikal na tulong sa tourism capacity building at isasama ang Baclaran Church sa mga programa nito sa pambansa at rehiyonal na promosyon.
Sisiguruhin naman ng ipinapanukalang batas, ang paglagak ng pondo para sa tourism development at posibleng dagdagan pa ito ng DOT mula sa kanilang sariling pondo. | ulat ni Nimfa Asuncion
