Sinuspinde na ng Maynilad Water Services ang scheduled daily water service interruptions sa mga lungsod ng Caloocan, Malabon, Manila, Navotas, Valenzuela at Quezon City.
Sinabi ng Maynilad na nakatulong ang mga pag ulan dala ni bagyong Dodong para mapataas ang water elevation sa Ipo Dam.
Ito ang dahilan kaya patuloy na natatanggap mula sa Portal ang 2,400 MLD (million liters per day) na kailangan ng Maynilad para mapanatili ang normal na serbisyo sa kabila ng mas mababang water allocation mula sa Angat Dam.
Pero paglilinaw ng water concessionaire, ibabalik lamang ang daily service interruptions kapag tumigil na ang water inflows sa Ipo Dam dala ng mga pagulan, at muling maramdaman ang kabuuang epekto ng 48 CMS allocation.
Bagama’t suspendido sa ngayon ang service interruptions, hinihikayat pa rin ang lahat na makiisa sa masinop na paggamit ng tubig.| ulat ni Rey Ferrer
