Muling inabisuhan ng Embahada ng Pilipinas sa Cairo ang mga Pilipino sa Sudan na umalis na sa nabanggit na bansa para na rin sa kanilang kaligtasan.
Ito ang inihayag ng embahada kasunod ng tumitinding tensyon sa pagitan ng iba’t ibang paksyon sa nasabing bansa.
Dahil dito, tuloy-tuloy ang ginagawang mga hakbang ng pamahalaan upang alalayan ang mga Pilipinong nagnanais na lumikas.
Kasunod niyan, inabisuhan ng embahada ang mga Pilipino na nagnanais lumikas patungong Egypt na sumunod sa mga inilatag na panuntunan at maagang mag-apply ng kanilang visa.
Kinakailangan ito upang makakuha ng clearance at temporary entry mula sa Egyptian Government alinsunod na rin sa pabatid ng Ministry of Foreign Affairs ng nabanggit na bansa.
Dapat ding ibigay ng mga Pilipino ang buo nilang impormasyon kahit na iyong mga daraan sa Port Sudan at kailangan ding may dala silang sapat na pera, pagkain.
Sigurihin din dapat ng mga Pilipinong nasa Sudan at nagnanais lumikas na bitbit nila ang kanilang pasaporte at agad ipagbigay alam sa embahada kung ito’y paso na o nawala.| ulat ni Jaymark Dagala
