Pinasinungalingan ng Bureau of Internal Revenue (BIR) ang mga job posting na kumakalat sa iba’t ibang social media platforms tulad ng Facebook at TikTok.
Nilinaw ni BIR Commissioner Romeo Lumagui, Jr. na walang kinalaman ang BIR sa pagpo-post ng trabaho at ang mga ito ay puro mapanlinlang at pandaraya.
Kaugnay nito, hinihikayat ng bureau ang publiko na maging mapagbantay at maging maingat sa mga alok na trabaho sa social media o iba pang mga platform.
Payo pa ng BIR Chief na palaging i-verify ang impormasyon mula sa mga opisyal na mapagkukunan upang maiwasan ang pagiging biktima ng mga scam.
Lahat ng mga indibidwal na naghahanap ng trabaho sa BIR ay hinihimok na umasa lamang sa mga opisyal na channel ng impormasyon ng bureau.
Ang kumpleto at lehitimong listahan ng mga bakanteng trabaho, kasama ang kani-kanilang mga kinakailangan, ay makikita lang sa BIR Website o BIR Official Facebook pages. | ulat ni Rey Ferrer
