Inatasan na ni House Speaker Ferdinand Martin Romualdez ang Committee on Appropriations at Ways and Means Committee na agad mangalap ng P120 billion ngayong taon para sa pension fund ng military and uniformed personnel (MUP).
Ayon kay Speaker Romualdez kailangan ng P3.6 trillion ng gobyerno sa susunod na 30 taon para matugunan ang problema sa pension fund ng MUP tulad ng backlog at pagdami na taon-taon ng mga retirees.
“But this fund must self-generate tulad ng sabi ni Pangulong Marcos para hindi maubos and continue to grow beyond that 30-year period”, paliwanag ng lider ng Kongreso.
Paalala pa ni Romualdez, “We have to take care of our troops and our uniformed personnel for they keep our nation and our people safe everyday”.
“We need to raise P120 billion every year for the next 30 years to address the problem sa pension ng mga sundalo at pulis”, ani House Appropriations Chairman Elizaldy Co.
“Base sa computation namin ni Ways and Means Chair Cong. Joey Salceda, P3.6 trillion ang kailangan para matugunan ang kakulangan sa pagbibigay ng pension sa MUP. “
Dagdag pa ni Cong. Co, kukunin ang nasabing pondo sa savings ng pamahalaan at pagbabawas sa mga gastusin na hindi naman mahalaga.
“For now, we are looking na it’s the GSIS (Government Service Insurance System) who will manage the fund”, ayon pa sa kinatawan din ng Ako Bicol Partylist.
“Rest assured na before the end of 2023, we will find a win-win solution for everyone”, pahabol ni Rep. Co.
Nauna nang ipinanukala ng Department of Finance (DOF) na ikaltas sa mga sahod ng uniformed personnel ang pension nila, subalit umalma ang ilang miyembro ng Armed Forces of the Philippines (AFP) at Philippine National Police (PNP).
Matagal nang ipinapaalala ng DOF sa mga nagdaang mga pangulo simula pa noong 2006 ang hinggil sa problemang ito matapos magsara ang retirement savings and benefit system (RSBS) ng MUP dahil sa korapsyon ngunit hindi naman ito natutugunan.
Piniling harapin na ng Marcos administration ang isyung ito at inatasan ang Kongreso na maghanap na ng pondo sa lalong madaling panahon.
