Binigyang linaw ng isang mambabatas na hindi mandatory o sapilitan ang Reserve Officers Training Corps (ROTC) sa panukalang National Citizens Service Training Program (NCSTP) Act.
Sa dinaluhang University of the Philippines-Manila forum, ipinaliwanag ni Tingog Party-list Rep. Jude Acidre, na ang NCSTP o House Bill 6687 ay ipapalit sa kasalukuyang National Service Training Program (NSTP).
Ang NCSTP ay dalawang taong mandatory training na ipatutupad ng Commission on Higher Education (CHED) sa lahat ng higher education institutions at ng Technical Education and Skills Development Authority (TESDA) sa lahat ng postsecondary Technical Vocational Institutions (TVI).
At bahagi lamang ang ROTC ng tatlo sa components nito, kabilang ang Civic Welfare Training Service (CWTS) at Literacy Training Service (LTS).
Optional lang aniya ang ROTC para sa mga estudyante na nais itong kunin.
Sakaling mapili ng estudyante na kunin ang ROTC, ay saka lamang ito sasailalim sa apat na taong military training program. | ulat ni Kathleen Jean Forbes
