Matagumpay na nailigtas ng mga tauhan ng Naval Forces Western Mindanao katuwang ang Municipal Inter-Agency Council Against Trafficking ang 21 katao na biktima ng human trafficking sa Bongao Pier sa Brgy. Poblacion, Bongao, Tawi-Tawi.
Ayon kay Niño Fernando Cunan Acting Public Affairs Officer, Naval Forces Western Mindanao ang mga ito ay naharang ng mga awtoridad lulan ng pump boat na patungo sana ng Malaysia na walang kaukulang travel documents at iba pang mga papeles nitong Agosto 10.
Sinabi ni Cunan na pinangakuan ang mga na-rescue ng trabaho sa Malaysia at pagkarating umano nila doon ay may sasalubong sa kanilang alyas Winda.
Sa isinagawang follow up operation nakasagip ang walo pang indibidwal na biktima din ng human trafficking sakay naman ng MV Ever Queen of Asia sa Bongao Pier at patungo ng Kota Kinabalu, Malaysia.
Ang mga nasagip ay nai-turn over na sa Ministry of Social Services and Development sa Bongao at kasalukuyan nang sumasailalim sa profiling and documentation ng MIACAT-Tawi-Tawi. | ulat ni Leo Sarne
📸: NFWM
