Naglabas ng ilang paalala ang Civil Service Commission sa mga examinee ng nakatakdang Career Service Examination-Pen and Paper Test (CSE-PPT) sa darating na Linggo, Aug. 20
Ayon sa CSC, ngayong nakapaskil na sa Online Notice of School Assignment o ONSA ang testing venue o school assignment ay mas mainam kung mabibisita na ito ng examinees para maging pamilyar sa direksyon at travel time.
Sa araw ng pagsusulit, dapat ay maagang nasa testing venue ang examinee dahil magsasara ito ng 7:45am.
Paiiralin din ang “No ID Card/Document, No Exam” policy kung saan hinihikayat ang mga examinee na magpresenta ng valid ID card.
Samantala, bagamat opsyonal na lamang ang pagsusuot ng face masks, pinapayuhan ang examinees na magdala pa rin ng face masks lalo sa mga nakatatanda, individuals with comorbidities, immunocompromised, buntis, unvaccinated at symptomatic individuals. | ulat ni Merry Ann Bastasa
