Idinepensa ng Department of Budget and Management (DBM) ang aabot sa P1.148 bilyon na panukalang budget ng Office of the President bilang travel expenses.
Ayon kay Budget Sec. Amenah Pangandaman, tumaas ito kumpara sa nakalipas na panahon bunsod na rin ng epekto ng COVID-19 pandemic kung saan, sarado ang ekonomiya ng buong mundo.
Paliwanag pa ni Pangandaman, bahagi ng gastusin ng OPS na kukunin sa nasabing pondo ay para sa State Visits ng Pangulo gayundin ang pagsasagawa ng roadshows.
Karaniwan aniyang naiimbitahan ang Pangulo ng ibang bansa sa State Visits at nagiging pagkakataon nito para matulungan ang ekonomiya ng bansa sa mga mamumuhunan dahil sa pagpasok ng maraming negosyo.
Habang sa roadshows naman, nakakasama ng Pangulo ang miyembro ng kaniyang economic team upang i-promote ang bansa sa mga potensyal investors
Dahil dito, naniniwala si Pangandaman na kailangang masuportahan ang mas maraming pamumuhunan at trabaho para sa mga Pilipino kasunod ng pagbubukas ng ekonomiya
Magugunitang naisumite na ng DBM sa Kongreso ang panukalang Php 5.768 trilyong piso sa ilalim ng 2024 National Expenditure Program o Pambansang Budget. | ulat ni Jaymark Dagala
