Inihayag ng Maritime Industry Authority (MARINA) na lumalabas sa isinagawa nilang imbestigasyon na walang lisensiya ang kapitan ng tumaob na bangka sa Binangonan, Rizal.
Ayon sa MARINA, nagkaroon sila ng pagpupulong sa mga representative mula sa Talim Island Passenger Motorboat and Patron Association kung saan dito nila nalaman sa record na walang balidong lisensya si Donald Anain na siyang boat captain ng Aya Express.
Bukod dito, pinag-usapan rin kung anong tulong ang maaaring ipaabot sa mga biktima.
Isa rin sa nireresolba ng MARINA at ng nabanggit na asosasyon ay ang insurance ng 27 nasawing pasahero.
Matatandaan na una nang nagpa-abot ng tulong ang Provincial Government of Rizal sa mga naulilang pamilya kung saan nagkasa rin sila ng sariling imbestigasyon.
Sinisiguro naman ng MARINA na tinututukan nila ang nangyaring insidente upang malaman ang mga pagkakamali ng Aya Express at mapanagot ito sa batas. | ulat ni Michael Rogas
