Pinaglaanan ng ₱1.4-billion na pondo sa ilalim ng 2024 National Budget ang paglilinis at rehabilitasyon ng Manila Bay.
Ito ang ibinahagi ni Quezon City Representative Marvin Rillo sa gitna na rin ng isyu ngayon sa reclamation project sa Manila Bay.
Ayon sa mambabatas nakapaloob ang naturang pondo sa Operational Plan for the Manila Bay Coastal Management Strategy ng Department of Environment and Natural Resources (DENR).
Kasama sa popondohan ang relokasyon ng 233,000 informal settler na direkta umanong nagtatapon ng maruming tubig sa mga lagusan patungong Manila Bay.
Para kay Rillo, na siyang vice chairperson ng House Committee on Metro Manila Development suportado niya ang pagpopondo para sa buong environmental restoration ng Manila Bay.
Nagpahayag na ng pagkabahala si Environment Secretary Maria Antonio Yulo-Loyzaga na maka-apekto ang reclamation sa Manila Bay sa kanilang mga hakbang upang masunod ang desisyon ng Korte Suprema. | ulat ni Kathleen Jean Forbes
📸: PNA
