May alok na libreng sakay ang MRT-3 para sa mga pasaherong visually impaired bilang pagdiriwang ng White Cane Safety Day.
Ayon sa pamunuan ng tren, maaaring ma-avail ang free ride sa buong oras ng operasyon ng MRT-3 simula ngayong araw, August 1 hanggang August 6.
Kailangan lamang ipresenta ang valid Persons with Disabilities (PWD) Identification Card sa security personnel ng mga istasyon.
Pahihintulutan din ang isang companion o kasama ng pasahero na makasakay nang libre sa mga tren.
Kasunod nito, tiniyak naman ni Department of Transportation (DOTr) Assistant Secretary for Railways at MRT-3 Officer-in-Charge Jorjette Aquino na patuloy na bibigyang prayoridad ang kapakanan at mga karapatan ng visually impaired passengers sa sapat, mabilis, komportable, at maaasahang transportasyon. | ulat ni Merry Ann Bastasa
