Binigyang diin ng isang mambabatas ang kahalagahan ng pagpapatibay sa panukalang Bureau of Immigration Modernization.
Ayon kay Camarines Sur Rep. LRay Villafuerte oras na maging ganap na batas ang panukala ay bubuo ng isang P1.2 billion-Immigration Trust Fund.
Dito aniya huhugutin ang pondo para imodernisa ang mga kagamitan ng BI, at gawing competitive ang sahod ng mga junior immigration officer maliban pa sa pagbibigay ng karampatang benepisyo gaya ng night time differential.
Sa pamamagitan aniya ng pagtaas sa salary grade ng immigration officer ng dalawang baitang ay umaasa ang mambabatas na mas makakahikayat ang BI ng mga aplikante.
Magreresulta naman aniya ang digitization at professionalization sa hanay ng BI, para mas mapaigting ang border control ng bansa at maipatupad ng tama ang immigration law.
Napapanahon aniya ito lalo at tumataas ang bilang ng cross border crimes, at upang mapigil ang pagpasok sa bansa ng mga dayuhan na sangkot sa drugs at human trafficking, prostitution, terrorism, illegal recruitment at financial crimes. | ulat ni Kathleen Forbes
