Inatasan na ng Quezon City government ang City Engineering Department na agad imbestigahan ang nangyaring pagguho ng bahagi ng pader sa construction site sa Civic Center B Building ng Quezon City Hall kagabi.
Sa paunang ulat ng Bureau of Fire Protection (BFP), nag-collapse pasado alas-10 kagabi ang bahagi ng pader ng gusali kung saan ipupuwesto sana ng pribadong contractor ang isang scenic elevator.
Isa ang naitalang nasawi matapos maipit habang apat pa ang sugatan.
Ayon sa QC LGU, kabilang sa aalamin nito ang sistemang pinaiiral ng kontratista sa construction site, at kung binigyang-halaga ang aspeto ng occupational safety.
Kasunod nito, tiniyak naman ng lokal na pamahalaan ang tulong sa mga nadamay na manggagawa. | ulat ni Merry Ann Bastasa
