Inaapura na ng Pamahalaang Lungsod ng Valenzuela ang pamamahagi ng ‘Balik Eskwela 2023 School Kits’ sa mga mag-aaral sa pampublikong paaralan bago ang pasukan ng klase sa Agosto 29.
Simula bukas, Agosto 17 hanggang 19, sabay-sabay nang ipapamahagi ang mga school kit sa mga mag-aaral mula kinder hanggang grade 6.
Sa loob ng tatlong araw, mamamahagi ang LGU ng school kits sa 42 paaralan sa lungsod.
Kabuuang 79,451 na mag-aaral mula sa kindergarten, elementary at special education students ang target beneficiaries ng school kits na bigay ng LGU.
Sinimulan ang distribusyon ng gamit pang-eskwela sa mga mag-aaral noong Lunes, Agosto 7. | ulat ni Rey Ferrer
