Hanggang kahapon, bigo pa rin ang Philippine Coast Guard (PCG) na makita ang apat na miyembro ng Coast Guard Rescue Team na missing sa Cagayan simula pa noong Hulyo 26.
Gayunman, umaasa pa rin ang PCG na buhay at ligtas ang apat at napadpad lang sa ibang lugar.
Pagtitiyak nito, hindi ititigil ng Coast Guard ang search and rescue operations hangga’t matagpuan ang hinahanap.
Katuwang na ang Coast Guard District Northeastern Luzon at iba’t ibang units ng Coast Guard stations, Philippine National Police (PNP), Philippine Army (PA), Office of Civil Defense (OCD) 2, Provincial Disaster Risk Reduction and Management Office (PDRRMO) at maging ang US aircraft sa isinasagawang aerial at surface search and rescue operations sa karagatan.
Una nang natagpuan ang aluminum boat na ginamit ng apat na rescuers sa karagatang sakop ng Barangay Fuga, Aparri, Cagayan.
Bago nawala ang mga PCG personnel, tinangka nilang i-rescue ang mga tripulante at kapitan ng isang tugboat sa Cagayan River sa kasagsagan ng pananalasa ni bagyong Egay. | ulat ni Rey Ferrer
