Kapwa nagpahayag ng kahandaan ang Pilipinas at Canada na isapinal ang Memorandum of Understanding on Defense Cooperation sa pagitan ng dalawang bansa.
Ito ang napagkasunduan nina Department of National Defense (DND) Secretary Gilbert Teodoro at Canadian Ambassador to the Philippines H.E. David Bruce Hartman nang mag-courtesy call ang embahador nitong Biyernes.
Sa kanilang pagpupulong, napagkasunduan din ng dalawang opisyal na isulong ang praktikal na kooperasyon sa larangan ng disaster resilience at “capacity building projects” sa pagitan ng mga ahensyang pandepensa ng dalawang bansa.
Inihayag naman ng embahador ang intensyon ng Canada na palakasin ang kanilang presensya sa Indo-Pacific Region.
Ipinaabot naman ni Sec. Teodoro ang kanyang imbitasyon sa Canadian Minister of Defense para magsagawa ng opisyal na pagbisita sa bansa bilang pagpapatatag ng bilateral defense relations ng dalawang bansa. | ulat ni Leo Sarne
📷: DND
