Nagpaabot ng pakikiramay si Philippine Red Cross (PRC) Chairman at CEO Richard Gordon sa pagpanaw ni Department of Migrant Workers (DMW) Secretary Susan “Toots” Ople.
Sa isang pahayag, sinabi ni Gordon na ikinagulat niya ang biglaang pagkamatay ng isang kaibigan at masipag na public servant.
Kasabay nito ay kinilala ni Gordon ang mga ambag ni Ople para maitaguyod ang kapanakanan at karapatan ng mga overseas Filipino worker (OFW).
Gaya ng pakikipagtulungan ng Ople Center Foundation sa PRC para makapagbigay ng iba’t ibang serbisyo sa mga OFW at mga pamilya nito.
Binigyang diin din ni Gordon ang pagpapatupad ng DMW ng OFW Pass sa ilalim ng pamumuno ni Ople. Aniya, mahirap pamunuan ang bagong departamento, pero nagawa ng yumaong kalihim na isulong ang mga pagbabago para maitaguyod ang interes ng mga OFW.
Umaasa naman si Gordon na ipagpapatuloy ng papalit na kalihim ng DMW ang nasimulan ni Ople at patuloy na isusulong ang karapatan ng mga migranteng Pilipino.| ulat ni Diane Lear
